1/11/22

Marilar Aleixandre, Premio Nacional de Narrativa 2022

O xurado destacou a súa obra 'As malas mulleres' (Galaxia) "pola súa orixinal estrutura híbrida que a converte nunha singular novela histórica sobre a situación carcelaria das mulleres no século XIX, cun admirable dominio do diálogo e da linguaxe".

Ademais, o xurado sinalou que "a obra recupera a memoria dunha forma brillante en diálogo coa tradición literaria. Un coro de voces femininas de diversas clases sociais introduce elementos da poesía popular e a cultura oral. A autora pon o acento nas desigualdades e á vez ofrece unha mirada esperanzadora: a capacidade de resiliencia e emancipación do ser humano, destacando a importancia da sororidade e do compromiso cos demais".

Lectura recomendada !

2/9/22

Que significa Bergondo?

Nesta publicación da Real Academia Galega podes coñecer un pouquiño máis sobre a orixe do topónimo do noso concello e dos do resto da provincia. O enlace levarate á páxina onde podes descargar a publicación.

https://publicacions.academia.gal/index.php/rag/catalog/book/377

1/9/22

Laxeiro.

O pasado 1 de abril o Día das Artes Galegas adicouse a Laxeiro. Con tal motivo o alumnado de Primaria e o alumnado de Ed. Plástica de Ed. Secundaria participou no traballo sobre este artista.

O alumnado de Ed. Primaria elaborou carteis cos datos biográficos do pintor, despois de traballar con diferentes materiais (nas redes e en fondos bibliográficos). Ademais fíxose un achegamento á súa obra a través de diferentes presentacións e de traballos variados. Con todo isto elaborouse unha pequena exposición.

Os carteis que recollen a súa biografía encadernáronse e pasan a formar parte dos fondos da nosa biblioteca.

O alumnado de Secundaria traballou sobre a súa obra, usando a técnica de estampación.

Agradecemos a colaboración da Fundación Laxeiro de Vigo, que nos facilitou diferentes materiais para traballar arredor da súa figura.

16/7/22

Francisco Fernández del Riego

Desde hai uns días xa coñecemos o autor homenaxeado no Día das Letras Galegas 2023: Francisco Fernández del Riego. No enlace da RAG tedes información sobre o autor.

https://academia.gal/-/a-rag-dedicaralle-o-d-c3-ada-das-letras-galegas-2023-a-francisco-fern-c3-a1ndez-del-riego

19/5/22

4º Concurso de lema para o Día Mundial do Medio Ambiente.

4º concurso de lema para o Día Mundial do Medio Ambiente

Con motivo da celebración do Día Mundial do Medio Ambiente o vindeiro 5 de xuño convócase o 4º concurso de lema para promover o coidado do noso entorno.

BASES PARA O CONCURSO DE LEMAS

Poderá participar todo o alumnado do C.P.I. Cruz do Sar distribuído en tres categorías:

Categoría A: alumnado de 1º a 3º de Ed. Primaria. Poderán participar cun debuxo sobre o coidado da natureza e o día do medio ambiente, no que se inclúa algún lema ou frase en galego que invite ao coidado do medio.
Categoría B: alumnado de 4º a 6º de Ed. Primaria. Poderán participar creando un lema que promova o coidado do medio ambiente.
Categoría C: alumnado de ESO. Poderán participar creando un lema que promova o coidado do medio ambiente.

Cada alumno ou alumna poderá presentar un traballo.
O tamaño de presentación dos traballos será A5 (medio folio), tanto en vertical coma en horizontal. Tamén se pode usar o modelo que se proporcionará como base para presentar o lema. Este ano o modelo é o planeta Terra, porque o lema que promove a ONU é “Unha soa terra”
Tamén se terá en conta a súa facilidade para a publicación, polo que non son aconsellables volumes, pregados ou brillos.
Cada traballo levará o nome, apelidos e curso do autor/a , na parte posterior do curso, ou no nome do arquivo enviado.
Os traballos poden ser entregados:

No correo electrónico do Equipo: ednlcruzdosar@gmail.com
Aos seus titores, ou profesores, que logo reenvirán ao Equipo.

O prazo de presentación de traballos remata o 10 de xuño. Non entrará en concurso ningún traballo entregado posteriormente a esa data.
Entre os traballos presentados serán seleccionados:

1 traballo de 1º, 2º e 3º de Ed. Primaria
1 traballo de 4º, 5º e 6º de Ed. Primaria
1 traballo de Ed. Secundaria.

Para a selección dos traballos terase en conta o uso correcto da Lingua Galega e a mensaxe que se transmite.
Estes tres traballos serán premiados cun cheque regalo para canxear na librería Biblos de Betanzos.
Os premios poderán declararse desertos se o equipo considera que non teñen a calidade suficiente.